14 jen 2025 k ap vini an make yon dat istorik nan mond foutbòl la. Se premye rankont nan kad FIFA Club World Cup nouvo fòma a, ak yon rankont ki mete fas a fas Inter Miami ak ekip lejand Afriken an, Al Ahly. Yon batay foutbolistik ant eksperyans ak rezistans, elegans ak tradisyon.
Nouvo fòma konpetisyon an ap gen 32 ekip ki divize an 8 gwoup, menm jan ak fòma koup di mond nasyon yo. Match lan ap jwe nan Hard Rock Stadium nan Miami, a 8:00 p.m. jou ki ap14 jen 2025. Sa se premye fwa Etazini ap òganize gwo evènman sa. FIFA vize pou li fè Club World Cup la vin tounen yon veritab "Champions League Mondyal" pou klèb yo.
An nou fè konesans ak ekip yo :
- Inter Miami soti Ozetazini e li ap konte sou jwè eksperimante tankou Lionel Messi, Busquets, Suárez ak Tyler Adams. Ekip la ap montre bon fòm nan MLS la e li sot ranpòte Supporters’ Shield la. Nan jwèt yo, yo mete aksan sou posèsyon balon, presyon wo epi yon mitan teren ki plen eksperyans.
- Al Ahly, lejand nan foutbòl Afriken an, sòti an Ejip. Yo gen jwè kle tankou Mohamed Sherif, gadyen El-Shenawy, ak atakan Percy Tau. Ekip la se dènye chanpyon CAF Champions League, e li gen yon taktik ki baze sou disiplin defansiv, blòk solid, ak kontratak rapid.
Ann abòde 3 pwen kle match la
- Premyeman, mitan teren an ap jwe yon wòl kle: èske Busquets ap mennen ritm lan oswa èske Al Ahly ap mete tè nan mayi li?
- Dezyèmman, kapasite Al Ahly nan kontra-atak kapab mete defans Inter Miami anba gwo presyon, espesyalman nan dezyèm mitan.
- E finalman, tout je ap fikse sou Lionel Messi. Èske li ka fè diferans lan depi nan premye rankont lan?
Anpil jounalis èspòtif ak djo kannèl pa rive antann yo sou previzyon ak prediksyon rankont sa. Men yo rive bay Inter Miami favori , gras ak vedèt li yo ak eksperyans yo, men Al Ahly abitye ak presyon konpetisyon sa yo e li ka siprann nenpòt ekip. Yo prévwa yon viktwa 2–1 oswa 2-0 pou Inter Miami, men pa janm di jamè !
Daprè ou men : Èske eksperyans ak talan pèsonèl pral domine sou disiplin ak espri ekip, oswa èske nou sou wout pou wè yon istwa foutbòl la k ap reekri ?
Abòne sou blog sa pou w pa rate analiz pou chak match FIFA Club World Cup 2025 la.
Swiv nou sou TikTok, YouTube ak Twitter: @AnbaKayimit