Jodi vandredi 10 jiyè 2020 an, machann nan mache Cluny te manifèste mekontantman yo apre 2 ajan lameri Okap, ki rele "Piti" ak "Alex", te maspinen yon chofè taksi moto. Dapre sa temwen rapòte bay kolaboratè nou John Eugene, altèkasyon sa rive fèt apwè ke ajan yo ta fwape yon fanm ansent e misye pat dakó.
Repòtè Pierre Frandto nan www.caphaitiennews.com te ale lopital Justinien kote viktim nan t ap pran swen ke ka li nesesite. Eta fizik li trè kritik. Lopital Justinien pa kenbe l se nan lopital Sacré-Coeur Milo a ke yo transfere l.
Sitiyasyon an te tèlman konplike nan mache a, se ajan UDMO ki te rive jere espas la. Jiska kounye a pa gen otorite ki pale, majistra Esaie te parèt nan mache a se ak kout wòch machann yo te resevwa l.
Nan moman an la se ajan sekirite yo ki ap fè aktyalite. Sa pa gen lontan yon ajan sekirite te touye yon timoun lari ki rele Mamoun Rejis, e otorite lajistis yo poko janm wè Mamoun nan gwo liv la.
Kounye a se yon fanm ansent ke ajan sekirite lameri Okap bay kout baton. Yo si tèlman konnen yo gen otorite ki ap sitire yo, yo mete twaka mò yon sitwayen ki t ap di yo sa pa posib pou yo ap bat yon fanm ansent. Sa montre klèman sou pouvwa prezidan Jovenel Moïse la, sitiyasyon dwa moun vin plis deteryore.
Commentaires
Enregistrer un commentaire